अच्छे दिनक दगड़ मुखसौड़ (मुखाभेंट )
घपरोळया , हंसोड्या , चुनगेर ,चबोड़्या -चखन्यौर्या -भीष्म कुकरेती
(s =आधी अ = अ , क , का , की , आदि )
(s =आधी अ = अ , क , का , की , आदि )
ब्याळि वर्चुवल वर्ल्ड याने फेस बुक मा मितैं अच्छे दिन मिल ग्यायि।
मि -ये भै अच्छे दिन ! यी क्या च भै ! तेरी जरूरत असली संसार मा च अर तू इख वर्चुवल वर्ल्ड मा डंडखणु छे ?
अच्छे दिन -मि जरा अपण पोस्ट दिखणु छौं बल कथगा Like छन।
मि -ह्यां कांड लगा तौं Like पर। तू इन बता तू कब आणु छे ?
अच्छे दिन -कख आण ?
मि -अरे सब्जी मंडी मा कब आणु छे भै। लोग कब बिटेन जग्वाळ मा छन कि कब अच्छे दिन आल अर तब सब्जी खाली देखिक पुछणा चीज ना खरीदण चीज ह्वे जालि।
अच्छे दिन -ह्यां पर इखमा म्यार क्या दोष। मि त सब्जी मंडी मा अड्डा लगाण चाणु छौ पर ....
मि -ह्यां पर क्याक पर लग गे ?
अच्छे दिन -अब पैल त टैम पर बरखा नि ऐ अर देर से ही सै आइ बि च त रुकणो नाम नी लीणी च त साक -भुजिन सड़नि छौ।
मि -सच्ची ?
अच्छे दिन -हाँ ! पर भौत दिनों से कालाबजारिया खवाळ वाळ में से प्रार्थना करणा छया कि -"हे अच्छे दिन ! चुनाव मा चंदा दीण से भौत नुक्सान ह्वे गे त जरा इना हमर तिजोरी तरफ बि नजर घुमै ले !" अब बिचारा बड़ी मिन्नत करणा छया त मि ब्लैक मार्किटियरुं तिजोर्युं पुटुक रौं। बड़ी सेवा टहल करदन हाँ इ ब्लैक मार्केटर्स !
मि -औ त ये साल दिवाली तलक सब्जी मंडी मा आग इ लगीं रालि।
अच्छे दिन -न्है न्है ! बीच बीच मा द्वी चार दिन त मि कनि आम लोगुं ड्यार जौलु।
मि -समजी ग्यों। समजी ग्यों। तेरी मनसा समजी ग्यों।
अच्छे दिन -तन ना बोल हां !
मि -अच्छा अच्छा छोड़ ! ह्यां उ उत्तर प्रदेशमा धार्मिक तनाव भौत ह्वे गे। जरा उना त जयादि।
अच्छे दिन -मि त जाणो तयार छौ पर विरोधी अर सरकारी दलूँ नेता अर धार्मिक उन्मादी नेता मि तैं उत्तर प्रदेश मा प्रवेश करण इ नि दीणा छन।
मि -हैं ?
अच्छे दिन -हाँ यूँ राजनीतिका नेता अर धार्मिक नेता मि तैं उत्तर प्रदेश बॉर्डर पर स्वार्थ की बाड़ से रोक दींदन त मीन कनकै उत्तर प्रदेश जाण ?
मि -अच्छा ! वो 24 X 7 घंटा बिजली त आण इ चयेंद कि ना ?
अच्छे दिन -देख ये बिजली का चक्कर मा मि तैं नि फंसा !
मि -क्या मतबल ?
अच्छे दिन -बड़ी जटिलता च बिजली मा।
मि -हैं ?
अच्छे दिन -देख अधिकतर प्रदेश बिजली चोरी रुकद नि छन अर निवेश का रूण रुणा रौंदन अर कोयला की जटिलता अलग च। प्लीज बिजली से मि तैं दूर ही रख।
मि -अच्छा उ रोजगार बढ़न वाळ छौ ?
अच्छे दिन - भै जरा मैन्युफैक्चरिंग बढ़न दे त रोजगार बजार मा बि अच्छे दिन ऐ जाल !
मि -ह्यां पर मैन्युफैक्चरिंग कब बढ़ल ?
अच्छे दिन -जब भारत मा मंदी याने रिसेसन खतम ह्वे जाल।
मि -भारत मा मंदी याने रिसेसन कब खतम ह्वाल ?
अच्छे दिन -जब अमेरिका अर हौर देसूं मंदी याने रिसेसन ख़तम होलु।
मि -अमेरिका अर हौर देसूं मंदी याने रिसेसन कब खतम होलु ?
अच्छे दिन -ओबामा , ब्रिटेन का प्रधान मंत्री कैमरून , यूरोपियन यूनियन का कर्ता -धर्ता लग्याँ छन मंदी दूर करण मा। बस एक दैं यूं देसुं मंदी खतम ह्वे ना कि इंडिया मा बि ……
मि -औ त इन बोलदि कि "मोदी जी आएंगे अच्छे दिन आएंगे" बि " गरीबी हटाओ " जन एक सुपिनौ नारा च।
अच्छे दिन -आइ Like युवर कंमेंट्स !
Copyright@ Bhishma Kukreti 9 8/8/ 2014
*लेख में घटनाएँ , स्थान व नाम काल्पनिक हैं ।
*लेख में घटनाएँ , स्थान व नाम काल्पनिक हैं ।
No comments:
Post a Comment